1. COLLECTIVE FARMING POLICY CHUNGCHANG:

Collective farming in a tum chu zậu/khaw khata awm leilet neitu/enkawltute zawn chhuah a, Farmer Producer Organization (FPO) pawl din sak a ni. Heng FPO te hi Micro-Enterprise (Cooperative Societies, PACS, etc) leh Service Institution (Bank) kaltlanga buh leh thlai thar chhuah leh hralh kawnga inkhaidiat ṭha zawk leh hlawk zawk nei thei turin hmalakpui an ni ang. Tin, heng FPO te hian thlai chin dan (cropping pattern) mumal tak neiin an leilet te an enkawl ang a, fur (Kharif Season) ah buh chingin ṭhal (Rabi Season) ah sumchang thlai an ching leh ang.

2. A THIL TUM TE:

1. Leilet neitu/enkawltute chu Farmer Producer Organization (FPO) anga hlawmkhawm a, buh leh thlai dangte an chinna kawnga hmalak dan ṭha zawk, hlawk zawk leh tunlai zawk te awlsam taka an zirho theih nana kawng siam sak.

2. Pawl dinna (Group formation) te, FPO a inziahluhna (registration) te, hmanraw chi hrang hrang leina turte mai bakah an thiamna te an tihpun (Human Resource Development) leh pawl anga thawhhona ṭha zawk (Social Capital Development) te chak zawka an kalpui theih nan hma lakpui a, a theih chen chena ṭanpuina pek.

3. Leilet neitu/enkawltu ten Sawrkar leh Bank aṭanga ṭanpuina an dawn theihna tur leh an buh thar chhuahte sumfaia an chan tir theihna tur kawnga harsatna hrang hrang awm thei te sut kian sak.

4. Leilet neitu/enkawltute buh leh thlai an chinna kawnga an tui zawng leh phur zawng te chhawm nun sak.

5. Leilet neitu/enkawltu ten a zâu (cluster) ang zawnga buh leh thlai chi (variety) thuhmun chin, thar chhuah leh hralhna lamah hlawk zawk leh awlsam zawk kawng an hmuh theihna tura remchang siam sak.

3. LONEITU A HUAM THEIH TE:

He policy hi Mizorama leilet neitu/enkawltute tana siam a ni ber a, 1 bigha (0.25 Hectare) a zau ram nei chin te an tel thei ang. FPO te hi member tam dan a zirin Category I leh II ah ṭhen a ni ang:

Category-I (51-100 members)

Category-II (20-50 members)

4. A HUAM CHIN: He Policy hi Mizoram pumpuia kalpui tura ruahman a ni. Autonomous District Council area te erawh a huam lo ang.